العلكة الزهريّة

قديش صعب .. تعيش جوّا كذبة مربربة ومدوّرة وداحلة فيك دحل ..
يم تكون هيك مسبوكة وممنتجة ومفصّلة بالزبط عَ قياس عقلك وحياتك ..
ملغوصة ومجلغمة وبالموت لتنفهم، ولّا لينعرفلها ساس من راس ..
بتبقى هيك .. متل طابة علكة .. مدحوش فيها زبايل .. يعني مجازاً بنحكي ..
كذبة كبييييييرة .. قد السما .. بتبلع بطريق دحدلتها فرحتك وبسمتك ودمعتك ومشاعرك .. ومن قد ما ملغوصة .. بتوصل المواصيل انها قد تبلع لكرامتك وحقوقك وحرّيتك كبني آدم ..
هلّأ بأعطل الظروف .. فيها تبلعك .. انتا كلّك عَ بعضك شيلة .. لحم وعظم ونفسيّة .. وأحلام وطموح وعمر ....
وبيرمح هالعمر .. والكذبة الكبيرة بتبلع وبتدحدل .. وبتكبر .. وبتكبر ... وبتكبر لحد ما انتا؛ حضرة جنابك، تقتنع فيها، وتصدقها وبتبطّل أصلاً تفكّر فيها لانها صارت انتا ..
بتصير بالنسبة الك هي الوضع الطبيعي والمفروض والعادي،
وغيرها بكون هو الكذبة ..
فـ من هون لحتى يخترعو مزيل او مبيد او رادع للعلكة اللاصقة .. بدك تتأقلم وتتعايش ....
وتتدحدل.

ودمتم سالمين
-- هلا أبو شلباية

ذا "فينومينا" :))

ظاهرة خرافيّة في تاريخ فلسطين --
الشعب عمل بالنصيحة الأشهر حالياً :: والله لنكيّييييف !! -- ووالله الشعب مكيّيييف !
قديش هالشعب مرعوب ومكتئب وبيعرفش من الألوان إلا الأسود كحل الليل .. قديش بيشوف نجوم الظهر عَ الحواجز وقديش بيعاني من تشوّه فكري وعاطفي .. ومادّي وصحّي وتربوي وتثقيفي وتعليمي ....
مش سيرة جديدة يعني ..
بس بالآخر الشعب مكيّيييف ! والفضل بالآخر لإبن المخيّم المتواضع محمد عسّاف ..
لا شك "فينومينا" لمّا مستحيل تلاقي اثنين يختلفو انّو صوتو صدّاح وحقيقي واروع من أي وصف .. حتى لو كانو من فصائل الوطن اللي صايرة أكثر من شعر الراس ..
لا شك "فينومينا" لمّا تلاقي المعتّر قبل المقتدر بيرمح يصوّتلو ..
لا شك "فينومينا" .. لمّا تشوف حجّات تسعينيّات جايات عَ الـ "ووكر" وعَ الكراسي المتحرّكة يشوفو عسّاف عَ شاشات العرض في المدن .. بيدعولو وبيمسحو دموعهن بهاليانس الأبيض اللي زي الفل، وبيغمروه براضهن عليه ..
لا شك "فينومينا" لمّا ابني ابو سنة ونص نطق بعد ماما وبابا : عسّاف .. وليسمع صوتو بيرمح يدبك !
يا محمد عسّاف فرّحتنا أي والله !
شفت كيف يوم وصلت رام الله، زوّارها وصلو قبلك من الخط الأخضر والقدس والشمال .. كتيييير اكثر من يوم وفاة الختيار أبو عمّار !
إسعاف ومكافحة شغب وتشريفات وعجقتنا يا بنيي ! ليلتها وانت واقف ع المسرح لو بس حكيت حيّا على الجهاد .. كان رجعت حيفا ! الله يحميك وتضل لأهلك وتضل متل ما انتا ابن المخيّم المحترم المتواضع !
شكراً عسّاف فرّحتنا !

-- هلا محمد أبو شلباية