رامي !

يا أولادي صباحكم سكّر ..
صباحُكِ معلّمتي خيرٌ ونورٌ وعنبر !
بعد انتهاء الدرس السادس عشر ..
عن خروجِ وفاءَ من الأَسْر؛
عندي لكم جميعاً خبر !
**
معلّمتي .. حبيبتي؛
انظري ما أجمل خطّي في الدفتر ..
انتِ من علّمتني أن أكتب وأكتب بلا ضجر !
انظري رسوماتي .. كيف يعلو فيها الشجر ..
والشمس ساطعةٌ، ووجه امّي كالقمر !
وكيف نصنع من العِلم جبالَ فِكْرٍ،
لنرتقي بوطننا، ونصنع من عقولنا أمْتَنَ جسر !
**
أحبابي أنتم ..
أريدكم ليَ ولأنفسكم فَخْر ..
ولفلسطينَ الأَرضَ والدارَ؛ ذُخر،
ولرب العالمين عابدين طائعين بلا كبْر ..
**
الآن ابنائي سأقول لكم
شيئاً، هو ليس بِسِر !
غداً الى المدرسة لن أحضُر !
لن تلُغى الحصّة الأولى
ستأتيكم بديلتي .. فإذاً لا مفَر !
**
اين ستذهبين معلّمتي ؟!
هل لديك موعدٌ مع طبيبٍ،
ام ستذهبين الى السوقِ،
تبتاعين الخُضَر ؟!
**
كلّا اطفالي .. كلّا ..
سأذهبُ لألقي التحيّة على البدر !
سأذهبُ أُناجي روح قلبي ..
سأُعانق الصقر ..
سأزور عيناي وقلبي وأسلّم على نَفَسي ..
وأضحك وأفرح ساعتين من العُمْر !
**
غداً سأزور طفلي ..
كلّا .. سأزور من كان يوماً .. طفلي
وهو رجُلٌ مهيبٌ الآنَ ..
ولكنه يقبع في الأَسْر !
**
كلّنا ابناؤك .. وكلّنا سنحفظ مرّةً أُخرى،
الدرسَ السادسَ عشر ::
وطنُ الحرّيّةِ لن يكونَ منذ اليوم ورقٌ وحبر !
وسنصرخُ من أعلى تلال الوطن وسنحفرُ
كلمتان على الصخر ..
"خَــرَجَ رَامي مِــنَ الأســْر".

-- هلا محمد أبو شلباية

رَحَلَ عَمّي!

حدودي في المَنفى تلاشت ..
وترجّل فارسٌ .. لاجئٌ .. آخر ..
أخذ معه ذكرياتٍ لبرتقالٍ يافاويّ الطعمِ
لم يذقه !
وملامح أمٍّ، حفرت الغربةُ خنادقَ تَعَبٍ في وجنتيها ..
أرَضيتَ المَهجرَ سَكناً أم رضيت سُكنىٰ العيشْ ؟!
لم تشأ البوحَ أبداً ولا زلنا لا نعلمُ !
غادرْتَنا في طرفة عينٍ .. عقدتَ العزمَ، فَدَمَتْ عيوننا ..
زوّادةٌ حُبْلى بقطعٍ من أرواحنا ..
خَطفتها وحلّقت عالياً في سماء الرحمٰن ..
هل مررت بفِلَسطينَ؛ أوَّلُ الكلامِ وأوّلُ الخُطى ؟!
هل تنفّست عبق زيتون البلاد ؟
هل رأيتَ أبي ؟
إن حَدث وتقابلتما .. سلّم عليه .. قبّل وجنتيه ..
وقُل له :: سيلحقون بنا عاجلاً أم آجلاً .. ولن تكونَ هُناك خيمةٌ ..ولن يكون شتات !
وسنقيم عُرسَ البرتقال في بيّاراتنا ..
وستحملُ أمّي فرحاً في وجنتيها ..
توزّعه على كلّ اللاجئين والمنكوبين والنازحين ..
وسنرقص حتماً،
سنرقصُ سنرقصُ ..
الى حين !

هلا محمد أبو شلباية | ٨/٢/٢٠١٣

خليك "بوزيتيف" !

الموضوع مش قصّة سلبّية او ايجابيّة .. القصة وما فيها انو يبدو عند كثير منّا نظرة "واقعية للواقع" ..
يعني للأسف عنّا "سوبر باورز" بتخلّينا نشوف "وحل الواقع" واضح زي عين الشمس ..
عَ فرض انو اصلاً بعمرو حداً شاف عين الشمس !
المهم ..
من قد ما نحنا شايفين وعايشين الخيبة والفَوَتان بالحيط بدون "مواربة" لازم كمان،
نشغّل نتفة هالذكاء ونعلّم حالنا بشكل أو بآخر فنون "بلف" الواقع ..
نكبّر عقلاتنا "ونبلفها" ..
لأنّو " أذر وايز" بنعيّد ! 
خلص بَح !
"چيم أوڤر" !
ودمتم بالفينها وسالمين ؛)

--هلا محمد أبو شلباية

القدس ٢٠١٣

ناهيك أن القدس هي العاصمة الأبدية لدولة إسرائيل ..

وناهيك أن القدس الشرقيّة هي عاصمة دولة فلسطين الحرّة المستقلّة ..

😊

دعونا نتحدّث عن القدس اليوم ::

تحديداً اليوم،

٥ آذار ٢٠١٣ ..

القدس، المدينة التي طال التهويد سكّانها ومعالمها على حدّ سواء،

فما الفرق بين حفر الانفاق تحت المسجد الأقصى،

وشاب عربي مقدسي فلسطيني،

تاه بهويّته وبات يطرب على الأنغام العبريّة والكلمات المبهمة لمغنية اسرائيلية مشهورة حتّى كاد صوت المسجّل يغطّي على صوت محرّك سيّارته!

القدس مدينة الأشباح من بعد الخامسة عصراً،

القدس المدينة المختلطة،

والتي يتّسم الحيّ العربي فيها برائحة المجاري وعشوائية البناء، وانفجار براكين النفايات ..

امّا الحيّ الاسرائيلي؛ فكأنماً حيّاً أُخذ من احدى الضواحي الاوروبيّة،

وطبعاً لا تغفل عن مرفقات الحي من العاب للاطفال ودور عبادة يهوديّة.

القدس العنصريّة بامتياز .. نعم، كيف لا ونحن نسمع كل يوم عن حوادث متفرّقة تطال "عرب القدس"، حوادث تنكيل وشتم والقاء نفايات وضرب مبرح والتسبب بأضرار ماديّة وبشريّة كبيرة.

اليوم في القدس قد يعتدي عليك مراهقٌ اسرائيلي بابشع الالفاظ وقد يحاول ضربك او خلع حجابك او .. او .. او ..

اليوم في القدس قد يخصّصون لك عربة خاصة في القطار مكتوبٌ عليها :: للعرب فقط.

اليوم في القدس قد تركب في سيّارة الاجرة وينزلك السائق ليقول لك :: آسف، شكلك عربي انا بطلعش عرب معي! - بالعبريّة طبعاً.

وبعد ٤-٥ محاولات قد تعثر على سيارة اجرة عربيّة بسائقها العربي ويسألك :: لوين ؟ فتجيبه :: مش مهم لوين الف الحمد لله لقيتك !!

ودمتم سالمين 😊

-- هلا محمد أبو شلباية

رسمة كلاسيك !

لمّا برسم شي خاص للأولاد ..
لجيل أقل من ١٨ 
بحس حالي بسرح فيهم وبنصب عليهم !
مش لشي والله ..
بس لأنو في بلدنا تحديداً ::
العلم مش "نور" ابداً، لأنو راتبك بعد العلم المزعوم اذا اقدرت تحصلو، مش رح تلحق تدفع فواتير "النور" ..
ولأنو إذا بتضلّك تسمع الكلام وتكون مؤدّب وخصوصي ترد عَ ماما مش رح تكون أشطر ولد .. رح تصير "هبيلة" ودلّوع ماما وهاي عاطلة بحقك !
لأنو الدنيا مش شمّة هوا .. عمليّاً الدنيا "أكلة" هوا مرتّبة وعَ كيف كيفك !
ولأنو كتير امور فايته ببعض وماخذه طابع "الانفصام العجيب" ..بس في شي واحد وحيد لمّا برسمو او بعلّم الأطفال يرسمو بكون صادقة ١٠٠٪ ::واللي هو رسمتنا الكلاسيكيّة الشهيرة ::عجل محروق بنص الشارع، اولاد بيطبشو حجار، والجيش بطخ علينا مع اضافة جديدة وهي الجدار وابراج المراقبة !
ودمتم سالمين.

الدرس السادس عشر !

آرام إبن الـ٦ سنوات،

عندو نسخ درس العربي ومتحمّس كتير ..

الدرس اسمو "وطن الحرّية" ..

بس آرام عندو ملاحظة عميقة بصراحة؛

واللي بتقول ::

-خَرَجَت وفاءُ مِنَ السجْن ! -- أوّل جملة في الدرس يا ماما غلط !

-طب ليش يا معلّم هات أشوف ؟!

-لأنّو وفاء مش حراميّة ولا سرّاقة ولا كذّابة ولا بتقتل في الناس .. مش لازم يحكو "سجن" وفاء مش مجرمة !!

-طيّب ؟!

-شو طيّب ! يا ماما لازم يكتبو هيك ::

" خَرَجَت وفاءُ من الأسْر "!

المهم آرام اقترح هالكلام على المعلّمة اللي صدقاً انا بحبها وبحترمها كثير بس بالآخر اتفقوا يحكو المكتوب بالمنهاج !

بس آرام بضلّو آرام ..

اتفق مع أصحابو جميعهم وخصوصي "مرح" انّو بعد ما يسَمعو الدرس للمعلمة "السجن" يحكو بصوت "وشوشة" :: الأسر !

ودمتم سالمين ؛))