الخرّافيّة الطرمة الأزليّة ::

رقم ٦٥ السنة مُستفز بطريقة عجيبة ..
غير عن الـ ٦٤ تبعت السنة الماضية ..
وغير عن الـ ٦٣ اللّي قبلها !
رقم ٦٥ لهاي السنة غير شكل ..

للّحظة في عندي ٦٥ مليون سبب يولّد هالشعور بالإستفزاز ..
خليني احكيلكو عن السبب الـ ٦٦ ؛)

٦٥ شو ؟ ٦٥ سنة ! مرّو عَ نكبة شعب انطخ وانذبح واتشرّد ولليوم عايش بالمرار .. وهيك عَ غفلة :: بيطلعلك واحد.. يعزمك عمليّاً على "ايڤينت" النكبة !

عدم المؤاخذة يمّا :: هو انتا اللي بتفصلو اميركا يم هيك بتلبسو ؟!
طب يا حبيبي عاجبك تلبسو قيسو بالأوّل ! طب بلاش تقيسو، سوّي اللي بدك اياه !
بس بلاش تلبّسنا اياه خاوة ! شاورنا بالأوّل وشوف شو الوضع !
بركي طلعنا شعب مفزلك .. وحابين توزعو علينا "چڤ أويه آيتمز" غير شكل السنة .. بدناش اقلام حبر مطبوع عليها ١٩٤٨ .. بدنا فلاشات لانو معلومك بيلزمو اكثر .. بدناش بلايز، بدنا "مچّات" السخن تعات السيّارة ويكونو مرتّبات السنة !
بركي بدناش نطيّر بلالين هيليوم ع الوان العلم بدنا اشي "كرييتيڤ" يحطّم العادات والتقاليد للـ "ايڤينت" .. واكيد بدنا مهرّج بس يكون مزوق عشان يرسم العلم ع وجوه ولادنا .. ترى اقل واحد فينا رح يجي جايب معو ٥ !

شو بعرفك انتا ! ترى كلنا بنفتح عَ النت ودايماً بنحب انكعكش .. والصراحة بنفهم كتير منيح بالـ "چيڤ أويه آيتمز" .. وبدّك الصراحة أكتر :: أصلاً احنا شعب بنموووووت بـ " أبو بلاش" !
هيك بتضمن بكل سهولة يكون "الإيڤينت" ناجح جداً ويضّلو الناس لسنة لقدّام يحكو فيه .. يعني لحد يوم " ايڤينت ال٦٦" !

واللي ما فهم المغزي من هالخرّاف .. برجاء ما حدا يشرحلو .. لانو اكيد بكون تحمّس يروح عَ "الايڤينت" :(

-- هلا محمد أبو شلباية

الله لا يعافيك !

- عَ العافية !
- يعافيك ..
- بالله شاحن السيارة مش شغّال ..
شكلو الولاعة ضربة شورت .. فيوز محروق .. شفلي اياها يسعدك !
- اه مزبوط ،، بس بدّك ما تآخذني مش تخصّصي ..
- دبّرها .. معلّم ..
- شوف غاد عَ اليمين جارنا كهربجي ومعدّل ..
- ماشي سلامات ..
- سلامات ..

- عَ العافية ..
- الله يعافيك تفضّل ..
- في عندي الولاعة ضاربة شورت ..
بعينك الله شغلة فيوز .. تشفلي اياها ..
- عمّي بدها كهربجي احنا هون ميكانيك ..
هيّو هظاك كهربجي معلّم شغلتك نص دقيقة بس روح صف عندو مش اللي قارمتو حمرا هظاك دهان وتجليس ، الثاني اللي بجمبو ..
- مشكور عمّي ..

- وين معلمك يا شاطر
- "علي" شوف الشب ..
- ع العافية ..
- يعافيك ..
- هاي الولاعة حارقة فيوز بحط شاحن التلفون بشحنش .. بعينك الله تشفلي اياها ..
- يالله
........
- شغل هالشاحن افحص ..
- يسلمو يسلمو ألف ألف يسعدو !
- وهاي رجعنا الوضع تمام وخذلك هالفيوزين احتياط بيلزمو ..
- شو بتؤمر ؟
- لا والله خلّي علينا ..
- لا يا زلمة تعبك ..
- معوّضين
- مع السلامة
- مع السلامة

- عَ العافية ..
- اهلاً تفضّل تفضّل ..
- هاي الفحوصات اللي طلبتها دكتور .. والوضع تعبان من سيّئ لأسوأ ..
والبنت شوفة عينك ..
والله بيحكولي بدها اختصاصي مـ شـ ــان ـــ ..
- شو اختصاصي ما اختصاصي يا زلمة !
وحّد الله !
شغلتها بسيطة اعطيها من هاظ ومن هاظ ومن هاظ وراجعني بعد اسبوعين ..
- يسلمو مشكور
- وين نسيت تحاسب .. ولا تأمين ؟
- له له تآخذناش بس والله مثل المضروب عَ راسو بحجر مش صاحي حامّة بالي هالبنت ..
- عند السكرتيرة .. الحساب .. عند السكرتيرة.
يا بنت دخلي اللي بعدو !

- عَ العافية دكتور ..
- (....)
- بخصوص بنتي ..
- استنّى يا اخي بالدور ..
يا بنت شوفي الاخ واعطيه رقم ..
- يا دكتور انا بدي احــ ـ ـكـ ـ ــيلك..
- في ناس قبلك يا اخي في مرضى ما بيجوز هيك !
- يا معلّم انا بس جاي اخبرك انّو العوض بسلامتك .. راحت البنت من بين ايدينا ..
- طب .. مشافية .. راجعني بعد اسبوعين ..

-- هلا أبو شلباية

٦٥ وعِد يا ولد !

بدّي أحكيلكو نكتة ::
مرّة ناس هجمو ع ناس تانيين ..
نزلو عليهم ويا غافل الك الله ،سرقو اراضيهم وميّة شربهم وخيرهم ..
وضلّو يطحو فيهم ويطخّو فيهم وينهبوهم ..
ويبنو ويعمرو ويتعلمّو ويخترعو ويكتشفو ..
ومن زايد لأزود ..
يطلعو بهالعمار ويعلّو ويعلّو ويعلّو ..
تنهم صارو احسن الناس ..
مش بالاخلاق يا عمّي ..
صارو احسن البشر بالعلم والدراية والتطوّر والاقتصاد ..
والناس التانيين .. لسّا عايشين ..
ويلهم يسدّو حفرة لتطلعلهم دعديرة ..
لا والله متل ما بحكيلك لسّا تامم منهم ناس وموجودين !
بس كيف بدنا نحكيها هاي بلا ما نستحي ..
عايشين عيشة الـ ****( الكلاب )
كلشي عندهم متصاوب ::
البني آدمين والكرامة والحرية والاكل والشرب والعلم وعد كنك بتعرف تعد ..
خرافهم دايماً اطرم ..
ورواق بالهم طوشة ..
وشمّة الهوا عندهم طلعة ع البلكون ع فرض في بيت ليكونلو بلكون ..
وخلفتهم سارحة والرب راعيها ..
واذا دقت النخوة باب دارهم
الزلمة فيهم بيطلع يطخ اخته ..
كل العالم استرزقت ع كتافهم ..
عَ شقفة ورقة عليها صورهم، ياما تعبّت بطون !
منهم وفيهم ومن كل اللي حواليهم ..
قال يا بخت مين نفع واستنفع ،
بس هون الوضع غير ..
هون بنقول يا بخت مين نفع ونفع !
لانو ما في "استنفع" .. هون بس في "غرق في المستنقع" !
وعَ فكرة هاي مش نكتة !
هاي سمّة بدن وانا كنت اعرف من الأول ..
متل كتير شغلات بتنعرف من الاوّل ..
بس سبحان الله .. احنا ناس بنحب انبّش !
وبس.
-- هلا محمد أبو شلباية